2017-08-11

小金魚成長記錄 - 說話能力 (18個月大要自己識講15個字?)

題目是「說話能力」但照片放廁所板? 
最近小金魚開大時會說"腰",工人姐姐說買廁所板讓她試, 
覺得她好像開始進入另一階段,於是突然想記錄成長情況…  photo L1020720P01_zpss4fnin9f.jpg


三個月前,當時小金魚18個月大,健康院姑娘問我,
小金魚自己可否表達出15個她自己明白意思的字,
別人說「花花」她跟著說「花花」這種不算! 要她自己表達出來的才算!
當時驚訝笑說「下? 18個月大原來要自己識講15個字架??」
     一數之下, 好像連十個字也沒有,
姑娘「唔,咁可能慢左D喎,唔緊要,可能宜家比較慢,
過一排可能會突飛猛進呢? 
小朋友語言發展要去到3至4歲先知道有無問題,唔洗擔心。」
 
 
 我不是擔心,我每天準時放工6點準時踏進家口陪她去玩,
不用做家務的情況下,陪伴她的時間不會比Full Time Mother少很多,
根據我長期陪伴和觀察,現階段我覺得她是一個正常的BB小朋友,
我不擔心她有什麼學習能力問題,經常說BB話鬧人/扮講電話的她,
我不擔心她不懂得說話,純粹覺得像考試不合格囉。
  photo L1020555P03_zpsha542i96.jpg
 
 
不過聽說不是所有BB都會說BB話,
去公園時遇過一個跟小金魚同年同月出身的小男孩,
婆婆說他孫子連BB話都不肯說,只肯說「唔唔唔」。
     photo L1020867P05_zpswkc0leqa.jpg
  

 現在小金魚21個月大,
所以記錄一下她現在能自己表達多少個她明白意思個字 :


爸爸、媽媽、姨姨、Hi Hi、Bye、喂喂、汪汪(她說不出"狗仔)、
貓貓/貓咪、波波、車車、單車、
眼眼、Eye、口、Mouth、耳仔、Head、手、腳、Toe、髮髮、洗手、
褲褲、街街、電話、書書、杯、BB、腰(她想說Yucky但說不到)、
樹(樹木和樹葉都說樹)、包包、水水、花花、mum mum(食)、咦、
蕉蕉,nana(她其實說Banana)、No、要呀、跳跳跳、轉轉轉、
飛呀、抱抱、靚靚、飽飽、
One Two Three Four Five Six Seven(勉強) Eight Nine Ten。


2歲要再次回健康院評估發展,
2歲又要識幾多個字才算合格呀呢?
說不定下次姑娘會問小金魚能說出多少句完整句子,
然後又要不合格了(笑)。


其實我真不覺得怎樣,只不過被說成好像不達標就當然有點不爽,
老媽說我2歲半前都不說話連BB話都不太說,差不多上幼稚園才開始說一點,
結果A-Level中文口試我還不是拿個A!

18 則留言:

  1. 其實健康院都係跟住一套指標做,唔洗太認真,我亦從來唔會理,小朋友發展有快有慢,佢喺一個範疇慢啲、可能喺另一範疇強過其他人,只要唔係偏差太遠就 ok 啦 !
    我冇記錄過阿女的成長進程,一歲前都有定期記錄佢嘅身高體同出牙情況,大大吓真係冇咁多精力同心機了 :P
    我過個女一歲多啲好似已經識講超過 20 個字,而家 27 個月大,會 be be ba ba 用句子駁嘴 ! 唔通我又要覺得佢係天才 ? 不過佢平衡感好差,兩歲幾行路都仲有啲一仆一碌向前「中」,所以每個人總有強弱項的

    回覆刪除
    回覆
    1. 我只係有D不爽╮(╯3╰)╭
      咁呀女宜家21個月講到五十幾個字情況都唔係好差~
      不過俾D 姑娘話佢唔達標緊係有D唔高興~即係好似考試唔合格咁囉
      我表姐個仔幼稚園時被評講野發展慢正常小朋友7個月~後尾做左半年言語治療後進步神速~
      宜家剛上小學把口醒到不得了~~

      刪除
  2. 我對健康院完全冇信心,當時個女仲係幾個月大循例跟時間去健康院檢查同打針,嗰次見咗一個佢地叫做醫生既阿嬸,佢話我個女耳仔裡面流血,跟住寫紙去政府醫院睇,不過唔係即時而係唔記得係幾日定一星期後,我地嚇到鼻哥窿冇肉梗係即刻帶去睇耳鼻喉專科,點知去到醫生度個醫生恥笑話佢連耳屎都唔識睇,自此之後打針檢查都係睇自己家庭醫生除咗嗰啲做評估。

    回覆刪除
    回覆
    1. 你個女個case錯得好誇張wo!!流血咁嚴重佢應該望多兩眼呀? 唔通真係唔識睇咁大件事?!
      健康院求奇都唔係新鮮事~~
      d姑娘都係靠幾分鐘面談去睇下洗唔洗再番去跟進~果幾分鐘又可以有幾詳細丫~

      刪除
    2. 講開健康院求奇令我諗起一個笑話,以前去做産檢,醫生望住個 file 問我有冇咩特別 ? 我話近月好頭痛,醫生望我ㄧ眼冇靈魂咁話「如果痛得太犀利就去睇醫生、休息多啲」…… 我「哦」咗ㄧ聲即收口但求快啲産檢完走人,心入面不禁諗「頂!你咪醫生囉,講埋啲廢話!」你求其答句夏天涼得多冷氣都會頭痛㗎我都覺得你 pro 啲吖 ~

      刪除
    3. 政府d產檢就算啦~我在醫院產檢咪一樣咁求奇~
      政府驗完唐士我自己都係走去出面俾8八蚊驗T21~結構同定期產檢都係出面照~
      去埋政府產檢我係純粹可以放多日隻

      刪除
  3. 唔使太擔心,我囡的情況與你女兒的差不多,同是歲半說話評估唔及格,因為詞彙量少,尼方面我知佢慢,但係同個囡平日接觸知佢智能係正常,而且上playgroup其他差不多月份的小朋友情況差不多,加上第一個小朋友少同輩接觸所以更加慢,我亦順其自然無特別理會。直至2歲返健康院今次要求要講句子,更加無可能,所以又唔及格,要2歲半再返健康院,跟住又話唔能夠講完整句子,要轉介見醫生,見醫生嗰日先知係做簡單智能test,心想都好做埋無壞,做左差不多40分鐘,又睇圖,分物,簡單揸筆畫圈,按指示分類,全部都過關,仲有啲範疇係超越現階段,而且我囡2歲4,5個月先開始講多左野,醫生話以現在兩歲半的情況已追得好快。其實健康院姑娘只係按一般情況判決小朋友的情況,但人有個別差異,何況細路,所以只要平日接觸能夠聽明指示,並作出回應,其實不用太擔心,講野遲早都會識,只係時間有快有慢。

    回覆刪除
    回覆
    1. 我個女出世到現在從來無去過playgroup...一個月一兩次同朋友年紀近果些仔女玩我當playgroup架啦...仲有星期一至五日日落公園見人我都當playgroup架啦...
      2歲要講句子我又係笑左~咁唔洗問我睇怕2歲半都要再番過去健康院啦...
      昨天同朋友個女玩~25個月大~都未講到句子(不過唱到首星星歌)~
      同埋識d字多好多~已經識講幾種顏色型狀~~話日日俾ipad佢睇所以識咁多~
      但我個人反對俾電話/平板佢睇~~
      不過有樣野好煩惱~工人姐姐講英文~我就講中文~~佢宜家又咁細個~我驚搞亂佢

      刪除
  4. 就係2歲時講野唔叻,所以幼稚園面試時報6間只有1間下午班收,其他面試時都問點解講野甘差,我都唔想解釋,你地係專業幼稚園老師無理由唔知小朋友發展有快有慢。
    有間老師仲衰話2歲應該識講好多野,有無返健康院check,我即時黑面,由個囡做唔到都算,完左即走,唔識講野又係細B就係蝕底。

    回覆刪除
    回覆
    1. 我果個11月細b,所以唔浪費時間,我直情俾佢做大大b遲一年先入學, d幼稚園老師嘛,有認識多年的blog友分享佢個仔報幼稚園,面試老師話佢個仔講野講得麻麻,然後話有個大佢4個月的小朋友已經識講咩識講咩,個blog友話當時果下好火,佢都識講大4個月啦,4個月真係爭好遠

      刪除
    2. 時代不同了!我女女就讀高中,仔仔初中,十多年前,健康院姑娘沒有為1歲半至幾歲小朋友檢測說話能力!請容我表達想清楚,小金魚追得上同一年出生的小朋友,不用讓她遲一年入學呀!以我看見,一個年級的約150人中,只有1或2個會選擇遲一年入學!我想您和我以前在香港讀書,情況也是差不多,不會有太多是遲一年入學的小朋友,反而,有很多成績優異是在同一年11或12月份出生的大有人在,小金魚能說那麼多生字,叻BB女!

      刪除
    3. 先多謝你留言呀~其實我本來都無特別想遲一年入學~不過同過一些細B的父母講開(已經入左學)~話細B interview真係好辛苦~其中有個話in左6間都無人收~結果去坊間d playgroup當上N班~又有一個舊同學個仔~本來今後應該係算小一(12月B)~最後選擇Repeat多一年K3~
      宜家我個女情況~由出世到現在21個月~從來無去過Playgroup~舊年無報N所以黎緊無學番~如果我今年以細B身份報幼稚園~一報就變左報K1~我好難想像一個從未去過N班/Playgroup的細B~點樣砌低人地果D已經番左成年N班/playgroup的小朋友...仲有~連我樓下附近d屋村幼稚園(已經唔係名幼d)~都講明細b interview的機會會好低...
      不過我成日都有d動搖係咪要報一兩間k1試下~haha...

      刪除
    4. 多謝您回覆我講述最近小朋友入幼稚園所面對的情況!小金魚照同一年出生入學,她將明年2018年9月入讀K1,到時是2歲10個月。來緊9月開始,你可報一些playgroup,你陪女女一起學習一些簡單遊戲、唱一些兒歌,一星期一堂,是有益親子學習话動,自自然里然會幫助面試!讀N班不是必須,因為你會陪她教她,媽媽爸爸教才是好!其實,很多细B是更聰明伶俐,我見小金魚常常以好奇開心表情拍照,我對小金鱼有多多信心!Mrs HO

      刪除
    5. 原來上面係Mrs HO留言! 無署名都唔知添~~今年報名其實仲有三兩個月就Interview~臨急抱佛唔徹了~haha~~其實我都唔止日日帶佢去公園見人~都仲會在家同佢一齊睇youtube兒歌跳舞~仲有買下坊間果d 小遊戲一齊玩(疊杯呀手抓板果d囉)~~不過經你一講我可能真係會揀三兩間K1試下~衰左就下年繼續報~~

      刪除
    6. 到時你們才決定都好呀!Mrs HO:)

      刪除
  5. 其實我係從yahoo年代已睇你既blog,有時會重睇,你blog既內容資料詳盡,而且相片拍攝很漂亮,我都係睇左你利用tenson及lotpost運日本網站買的東西,才開始學會日本網購,所以你既分享真係好有用。^_^
    我平時無留過言,這次因為小朋友有差不多經歷,所以留言分享,希望你繼續寫旅遊blog文,分享你的旅行經歷。^_^

    回覆刪除
    回覆
    1. 太驚訝了! YAHOO年代!!我都多謝你分享~希望你個小朋友繼續健康成長
      等我得閒都寫多少少有關小朋友GE野 :P

      刪除